11 декабря

Канон святителю Феодору, архиепископу Ростовскому, чудотворцу

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

От ю́ности твоея́ до́бре воспита́вся труда́ми, воздержа́нием, посто́м и моли́твами, чи́сту и непоро́чну сотвори́л еси́ ду́шу твою́, сего́ ра́ди на престо́ле святи́тельства се́л еси́, и я́ко звезда́ многосве́тлая, просвеща́я ве́рных сердца́ заря́ми чуде́с твои́х, о́тче на́ш, святи́телю Фео́доре, и ны́не моли́ Христа́ Бо́га, да спасе́т ду́ши на́ша.

Ин тропа́рь, гла́с то́йже:

От ю́ности, прему́дре, приле́жно подвиза́вся, и извеще́нием Свята́го Ду́ха превели́кую оби́тель воздви́же Пресвяте́й Богоро́дице в похвалу́ Рождества́ Ея́, струя́ми же сле́з твои́х безпло́тныя враги́ погрузи́л еси́, и жития́ твоего́ целому́дрием со Ангельскими ли́ки совокупи́вся, преподо́бне о́тче Фео́доре, с ни́ми же Христа́ Бо́га моли́ спасти́ся душа́м на́шим.

Кано́н гла́с 8.

Пе́снь 1.

Ирмо́с: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святителю отче Феодоре, моли Бога о нас.

Го́споди Бо́же мо́й, отве́рзи моя́ недосто́йная уста́, Отчее Сло́во, да досто́йно возмогу́ воспе́ти по́двиги святи́теля Твоего́ и уго́дника.

Припев: Святителю отче Феодоре, моли Бога о нас.

Реши́ти и вяза́ти приимы́й вла́сть от Архипа́стыря Небе́снаго, святи́телю Христо́в Фео́доре, разреши́ свя́занный язы́к мо́й плени́цами беззако́ний на славосло́вие и́мени твоему́ свято́му.

Сла́ва Отцу́ и Сы́ну и Свято́му Ду́ху:

Еже пасти́ ста́до христоимени́то предъизбра́н бы́в Боже́ственною благода́тию, ты́ же, я́ко ра́б послушли́вый, я́ко па́стырь до́брый, приле́жное име́л еси́ о ста́де твое́м попече́ние.

И ны́не и при́сно и во ве́ки веко́в. Ами́нь.

Богоро́дичен: Ма́ти Бо́жия, Пречи́стая, и Благослове́нная, и Всенепоро́чная, души́ моея́ стра́сти исцели́, и стра́сти плотски́я отжени́, и свободи́ у́м мо́й от вся́каго вре́да и от вра́жия мя́ напа́сти изба́ви, Влады́чице.

Пе́снь 3.

Ирмо́с: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Припев: Святителю отче Феодоре, моли Бога о нас.

Де́латель бы́в за́поведей Госпо́дних, непреста́нно в ни́х поуча́яся, святи́телю Фео́доре, сего́ ра́ди возше́д на небеса́, и ны́не предстои́ши престо́лу Влады́чню, со Ангельскими ли́ки непреста́нно воспева́еши: не́сть свя́т, па́че Тебе́, еди́не Человеколю́бче.

Припев: Святителю отче Феодоре, моли Бога о нас.

От земны́х не́др восприе́млем, я́ко да́р освяще́н, сокро́вище безце́нное — честны́я твоя́ мо́щи, святи́телю Фео́доре, от ни́хже прие́млем душа́м на́шим освяще́ние, Христа́ воспева́юще: не́сть свя́т, не́сть пра́веден, па́че Тебе́, Го́споди.

Сла́ва Отцу́ и Сы́ну и Свято́му Ду́ху:

Хра́м Свята́го Ду́ха от ю́ности бы́л еси́, о́тче Фео́доре, сего́ ра́ди и по сме́рти соблюде́ся те́ло твое́ нетле́нно, его́же христоимени́тии лю́дие, отвсю́ду собра́вшеся, ра́достно облобыза́ем, вопию́ще Христу́ Спаси́телю: не́сть свя́т, не́сть пра́веден, па́че Тебе́, Го́споди.

И ны́не и при́сно и во ве́ки веко́в. Ами́нь.

Богоро́дичен: Цари́це и Влады́чице, Де́во Богоро́дице, под кро́в Тво́й прибега́юще и пою́ще, Сы́ну Твоему́ Христу́ Бо́гу воспева́юще: не́сть свя́т, не́сть пра́веден, па́че тебе́, Го́споди.

Седа́лен, гла́с 8:

Яко виногра́д при́сно зелене́ющий, архипа́стырским твои́м всегда́шним уче́ния напое́нием, па́ствы твоея́ о́вцы сотвори́л еси́, и́хже, умно́жив, в благоче́стии возрасти́л еси́, и от сего́ ве́рен ра́б и де́латель виногра́да Христо́ва показа́лся еси́, сего́ ра́ди и труда́м возме́здие досто́йно восприя́л еси́, святи́телю, моли́ Христа́ Бо́га, да спасе́т ду́ши на́ша.

Сла́ва и ны́не, Богоро́дичен:

Кади́льнице всезлата́я, Мари́е Всенепоро́чная, Христа́ моли́, Его́же родила́ еси́, изба́витися на́м от бе́д и огня́ ве́чнующаго.

Пе́снь 4.

Ирмо́с: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Припев: Святителю отче Феодоре, моли Бога о нас.

Поще́ниями в жи́зни се́й, я́ко сне́дьми любоче́стия, пита́яся, ду́шу твою́, блаже́нне, ны́не веселя́щуюся предста́вил Творцу́ все́х, призыва́ющему тя́, в вы́шней Боже́ственней сла́дости ра́дуешися.

Припев: Святителю отче Феодоре, моли Бога о нас.

Моли́твою возше́л еси́ в небе́сная, иде́же с ли́ки оте́ц пребыва́я, весели́шися, помина́й, всеблаже́нне, па́мять твою́ све́тло торжеству́ющия.

Сла́ва Отцу́ и Сы́ну и Свято́му Ду́ху:

Уясня́ют воспева́юще, Ангельстии чи́ни па́мять твою́, святи́телю Фео́доре, та́кожде и мы́, земни́и, уми́льно вопие́м ти́: испроси́ оставле́ние прегреше́ний и благи́х наслажде́ние.

И ны́не и при́сно и во ве́ки веко́в. Ами́нь.

Богоро́дичен: Правосла́вною ве́рою и любо́вию притека́ющих Ти́ и со стра́хом пою́щих Тя́, моле́бный гла́с услы́ши, Влады́чице.

Пе́снь 5

Ирмо́с: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и к све́ту за́поведей Твои́х пути́ моя́ напра́ви, молю́ся.

Припев: Святителю отче Феодоре, моли Бога о нас.

Святи́тельства оде́ждою оде́ян бы́л еси́, всеблаже́нне, приле́жное моле́ние за лю́ди твоя́ приноси́л еси́, да ми́лостива обря́щут в де́нь су́дный.

Припев: Святителю отче Феодоре, моли Бога о нас.

Умиле́ния исто́чник мне́ испроси́ в честне́й па́мяти твое́й, святи́телю Фео́доре, да омы́ю скве́рну души́ моея́ покая́нием и твои́ми моли́твами да обря́щу жи́знь ве́чную; пути́ моя́ напра́ви, молю́ся.

Сла́ва Отцу́ и Сы́ну и Свято́му Ду́ху:

Повеле́нию Христо́ву после́дствуя, кро́ток и смире́нен се́рдцем и все́м свя́т бы́л еси́, уподобля́яся вселе́нныя учи́телю и покая́ния наста́внику, моли́твами твои́ми просвети́ и мое́ се́рдце, греха́ми омраче́нное, пути́ моя́ напра́ви, молю́ся.

И ны́не и при́сно и во ве́ки веко́в. Ами́нь.

Богоро́дичен: Мои́х прегреше́ний плени́цы расто́ргни, Твоего́ Сы́на и Бо́га моля́щи, и томя́щий мя́ гре́х при́сно низложи́, я́ко да воспева́ю Тя́ всегда́, Всенепоро́чная, Тобо́ю спаса́ем.

Пе́снь 6.

Ирмо́с: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святителю отче Феодоре, моли Бога о нас.

Го́рдаго зми́я низложи́л еси́ ору́жием смиренному́дрия, всеблаже́нне, и, возвы́сився ду́хом, во оби́тели присножи́зненныя всели́лся еси́, иде́же, со Ангельскими во́инствы ликовству́я, в Тро́ице Еди́наго Бо́га воспева́еши.

Припев: Святителю отче Феодоре, моли Бога о нас.

Освяще́н бы́л еси́ Боже́ственною благода́тию, богому́дре Фео́доре, е́же пасти́ ста́до ове́ц слове́сных, ты́ же, я́ко па́стырь и́стинный, всеприле́жное о вруче́нном тебе́ ста́де име́л попече́ние.

Сла́ва Отцу́ и Сы́ну и Свято́му Ду́ху:

Чи́на Ангельскаго удосто́ился еси́, досточу́дне святи́телю, Ангельскую ре́вность в житии́ свое́м показа́л еси́, с ни́ми у́бо приле́жно моли́ изба́витися от напа́сти воспева́ющим тя́.

И ны́не и при́сно и во ве́ки веко́в. Ами́нь.

Богоро́дичен: Кре́пость моя́, пе́ние и спасе́ние е́сть Госпо́дь, Юже Тя́, Ма́терь Пречи́стую и Неве́сту неневе́стную предъизбра́л, Его́же о рабе́х Твои́х при́сно непреста́й моли́ти, Чи́стая.

Конда́к, гла́с 4:

В моли́твах Го́сподеви предстоя́, я́коже кре́пкий адама́нт, по вся́ дни́ и но́щи пред лице́м Бо́жиим светя́ся моли́твами, и́хже ра́ди трудо́в Незаходи́маго Све́та сподо́бився, но́, я́ко име́я дерзнове́ние к ро́ждшемуся от Святы́я Де́вы, Христу́ Бо́гу на́шему, Его́же моли́ непреста́нно о все́х на́с.

Икос:

Ангела о́бразом, челове́ка су́ща естество́м, имену́ем тя́ бы́ти, преблаже́нне святи́телю Фео́доре, а́ще и тле́нную на земли́ пло́ть носи́л еси́, но́ нетле́нием оде́ян яви́лся еси́, те́мже вопию́ще ти́ ра́дуйся прино́сим: ра́дуйся, Це́ркве Христо́вы те́плый защи́тителю; ра́дуйся, избра́нный Ду́ха Свята́го сосу́де; ра́дуйся, Ангелов собесе́дниче; ра́дуйся, апо́столов и́стинный прее́мниче; ра́дуйся, святи́телей сопресто́льниче; ра́дуйся, му́чеников похвало́; ра́дуйся, по́стников пресла́вное удобре́ние; ра́дуйся, преподо́бных ве́нче; ра́дуйся, па́стырю до́брый; ра́дуйся, во́ине Христо́в непобеди́мый; ра́дуйся, звездо́ пресве́тлая, в Росто́ве возсия́вшая; ра́дуйся, но́вый чудотво́рче Фео́доре.

Пе́снь 7.

Ирмо́с: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Святителю отче Феодоре, моли Бога о нас.

Изба́витися ста́ду твоему́ вся́каго озлобле́ния и ско́рби моли́ся, святи́телю Фео́доре, ты́ бо еси́ спасе́ния наде́жда непосты́дна, упова́ние изве́стно, и́стина необори́мая.

Припев: Святителю отче Феодоре, моли Бога о нас.

Бо́жиим манове́нием после́днему ро́ду явле́на бы́ша честны́я мо́щи святи́теля Фео́дора, си́м у́бо прикаса́ющиися освяще́ние прие́млем, Христу́ вопию́щи: отце́в на́ших Бо́же благослове́н еси́.

Сла́ва Отцу́ и Сы́ну и Свято́му Ду́ху:

Жезло́м па́стырским до́бре лю́ди твоя́ упа́сл еси́, о ни́хже я́ко ве́рен па́стырь Христу́ возопи́л еси́: отце́в на́ших Бо́же благослове́н еси́.

И ны́не и при́сно и во ве́ки веко́в. Ами́нь.

Богоро́дичен: Ты́ еси́, Пречи́стая Богоро́дице, прибе́жище на́ше и утвержде́ние, моли́ Сы́на Твоего́ и Бо́га на́шего пода́ти на́м спасе́ние и грехо́в оставле́ние.

Пе́снь 8.

Ирмо́с: Богоглаго́ливии о́троцы в пещи́, со огне́м пла́мень попира́юще, поя́ху: благослови́те, дела́ Госпо́дня, Го́спода.

Припев: Святителю отче Феодоре, моли Бога о нас.

Го́споду просла́вившу уго́дника Своего́ святи́теля Фео́дора, мно́гим бо ле́том преше́дшим, сокрове́ны бы́ша честны́я его́ мо́щи, но ны́не вси́ я́ве зря́ще, согла́сно воспева́ют: благослови́те вся́ дела́ Госпо́дня Го́спода.

Припев: Святителю отче Феодоре, моли Бога о нас.

Хра́м Свята́го Ду́ха от ю́ности бы́л еси́ о́тче, сего́ ра́ди и по сме́рти соблюде́ся те́ло твое́ нетле́нно, и сие́ ра́достно лобыза́юще вопие́м: благослови́те вся́ дела́ Госпо́дня Го́спода.

Сла́ва Отцу́ и Сы́ну и Свято́му Ду́ху:

Ми́лостив у́бо и кро́ток, преподо́бен и незло́бив бы́в, я́коже Па́вел о Христе́, похваля́я, рече́: тако́в на́м подоба́ше Архиере́й, — Его́же моли́, благослове́нне архиере́ю, в ми́ре сохрани́ти ста́до твое́.

И ны́не и при́сно и во ве́ки веко́в. Ами́нь.

Богоро́дичен: Упра́ви души́ моея́ движе́ние, Всенепоро́чная, к Боже́ственным повеле́ниям Возсия́вшаго из чре́ва Твоего́, бу́ри избавля́ющи мя́ жите́йских собла́знов хода́тайством Твои́м.

Песнь 9

Ирмо́с: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святителю отче Феодоре, моли Бога о нас.

Ужасо́хомся и почуди́хомся, па́че же стра́хом и ра́достию объя́ти бы́хом, я́ко по толи́цех ле́тех обрето́шася честны́я мо́щи святи́теля Фео́дора це́лы и неразруши́мы, от ни́хже истека́ет исцеле́ния исто́чник приснотеку́щий.

Припев: Святителю отче Феодоре, моли Бога о нас.

Ра́дость и весе́лие и неизрече́нное ра́дование твоему́ ста́ду, святи́телю, показа́ся обре́тение честны́х моще́й твои́х, о ни́хже испроси́ на́м оставле́ние грехо́в и ве́лию ми́лость.

Сла́ва Отцу́ и Сы́ну и Свято́му Ду́ху:

Моли́твою, воздержа́нием и бде́нием возше́л еси́ на небе́сная, иде́же, с ли́ки Ангельскими пребыва́я, весели́шися, помина́й, всеблаже́нне, па́мять твою́ све́тло торжеству́ющия.

И ны́не и при́сно и во ве́ки веко́в. Ами́нь.

Богоро́дичен: Глаго́лом Твои́м после́дующе, ро́ди родо́в, Блаже́нная, Тя́ ублажа́ют при́сно, Бо́га бо и́стинно родила́ еси́, Чи́стая Де́во, вся́ блаже́нныя, Тому́ рабо́тающия нело́жно, творя́щаго.

Свети́лен:

Плотски́я мудрова́ния ду́ху повину́л еси́ и, я́ко зла́то огне́м, искуси́вся, прия́телище Ду́ху Пресвято́му яви́лся еси́, святи́телю о́тче Фео́доре.

Тропарь святителям Ростовским, глас 4

Святителие премудрии,/ паствы вашея учителие богопросвещеннии,/ веру евангельскую в людех преумножившия,/ любве Небесныя на земли достоподражательнии образи,/ люди страны Ростовския и Ярославския приобщавшии спасению,/ служителие воистинну Божии/ и сопричастницы апостолов достойнии явилися есте,/ Леонтие священномучениче, Исаие, Игнатие, Иакове, Феодоре/ и златословесниче Российский Димитрие,/ Христа Бога молите/ о архиереех, на престоле вашем преемницех,/ о людех, благочестно вас почитающих,/ о стране нашей православной// и о всей Христовой Церкви.

Кондак святителям Ростовским, глас 4

Новаго Завета Бога с человеки хранителие,/ евангельских заповедей исполнителие,/ в добрых делех совершеннии,/ святителие мудрии, преподобнии и праведнии Богоноснии,/ землю Ростовскую и Ярославскую/ облагоухавшии молитвами,/ именуемии вси и неименуемии,/ явленнии и сокровеннии,/ предстояще Живоначальней Троице,/ не отступайте от нас духом/ и Божественное милосердие преклоните к нам,/ да с дерзновением славу в Вышних Богу вси приносим,/ да пребудет на земли мир нерушимый,/ любовь же и благоволение// посреде всех человек.

Молитва святителям Феодору и Иоанну Суздальским

О, велицыи угодницы Христовы и чудотворцы, святителие Феодоре и Иоанне! Се мы, недостойнии и грешнии, скорбьм многими угнетаемии, к вам усердно прибегаем и с упованием крепким молимся: отцы благомилостивии и благопослушливии, милостивно услышите ныне глас наш молебный, и потщитеся на помощь нашу, и, яко при жизни вашей всем скорбящим и озлобленным помощницы и утешителие бысте, тако и ныне любовь вашу к нам явите благодатным действом богоприятных молитв ваших, претворяюще скорбь нашу на радость, печаль же на утешение, вся бо можете о укрепляющем вас Христе, Егоже вернии служителие бысте, от Негоже приявше вся обетованная благая, низпослите и нам великую и богатую милость Господню, да воспоем и прославим дивнаго во святых Своих Бога, Отца и Сына и Святаго Духа, ныне, и присно, и во веки веков. Аминь.